ਲੁਧਿਆਣਾ ਦੇ ਇੰਡਸਟਰੀਅਲ ਹੱਬ ਦੇ ਜਨਤਾ ਨਗਰ ਇਲਾਕੇ ‘ਚ ਬੁੱਧਵਾਰ ਨੂੰ ਮਸ਼ਹੂਰ ‘ਊਸ਼ਾ’ ਫਰਮ ਦੇ ਉਤਪਾਦਾਂ ਦੇ ਰੂਪ ‘ਚ ਜਾਅਲੀ ਸਿਲਾਈ ਮਸ਼ੀਨਾਂ ਬਣਾਉਣ ਅਤੇ ਉਨ੍ਹਾਂ ਨੂੰ ਬ੍ਰਾਂਡ ਕਰਨ ਵਾਲੀ ਇਕ ਯੂਨਿਟ ਦਾ ਪਰਦਾਫਾਸ਼ ਕੀਤਾ ਗਿਆ। ਲੁਧਿਆਣਾ ਦੀ ਡਿਵੀਜ਼ਨ-6 ਪੁਲਿਸ ਨੇ ਛਾਪੇਮਾਰੀ ਕਰਕੇ ਯੂਨਿਟ ਵਿੱਚੋਂ ਵੱਡੀ ਗਿਣਤੀ ਵਿੱਚ ਨਕਲੀ ਸਿਲਾਈ ਮਸ਼ੀਨਾਂ ਜ਼ਬਤ ਕੀਤੀਆਂ। ਲਾਂਸਰ ਨੈੱਟਵਰਕ ਲਿਮਟਿਡ, ਨਵੀਂ ਦਿੱਲੀ ਦੇ ਵਿਸ਼ੇਸ਼ ਜਾਂਚ ਮੈਨੇਜਰ ਅਰੁਣ ਮਾਥੁਰ ਨੇ ਆਪਣੀ ਟੀਮ ਦੇ ਮੈਂਬਰ ਤੋਂ ਸੂਚਨਾ ਮਿਲਣ ਤੋਂ ਬਾਅਦ ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾਈ ਸੀ। ਰਾਹੁਲ ਸ਼ਰਮਾ ਨੇ ਉਸ ਨੂੰ ਸੂਚਨਾ ਦਿੱਤੀ ਸੀ ਕਿ ਤੇਜਿੰਦਰ ਸਿੰਘ ਅਤੇ ਉਸ ਦਾ ਲੜਕਾ ਅੰਮ੍ਰਿਤਪਾਲ ਸਿੰਘ ਜਨਤਾ ਨਗਰ ਲੁਧਿਆਣਾ ਦੀ ਇੰਪੈਕਸ ਲੇਨ (ਨੰਬਰ 23) ਵਿਖੇ ‘ਊਸ਼ਾ’ ਦੇ ਨਾਂ ‘ਤੇ ਨਕਲੀ ਸਿਲਾਈ ਮਸ਼ੀਨਾਂ ਬਣਾ ਰਹੇ ਹਨ। ਇਹ ਪਿਉ-ਪੁੱਤ ਬਰਾਂਡ ਦਾ ਅਸਲੀ ਲੇਬਲ ਲਗਾ ਕੇ ਲੋਕਾਂ ਨੂੰ ਠੱਗ ਕੇ ਸਥਾਨਕ ਬਾਜ਼ਾਰ ਵਿੱਚ ਨਕਲੀ ਸਮਾਨ ਵੇਚ ਰਹੇ ਸਨ।ਪੁਲਿਸ ਨੇ ਸ਼ਿਕਾਇਤ ‘ਤੇ ਤੁਰੰਤ ਕਾਰਵਾਈ ਕਰਦਿਆਂ ਉਕਤ ਸਥਾਨ ‘ਤੇ ਛਾਪੇਮਾਰੀ ਕੀਤੀ। ਸਬ-ਇੰਸਪੈਕਟਰ ਰਜਿੰਦਰ ਪਾਲ ਦੀ ਅਗਵਾਈ ਹੇਠ, ਪੁਲਿਸ ਨੇ 25 ਨਕਲੀ ਸਿਲਾਈ ਮਸ਼ੀਨਾਂ (ਸਾਰੀਆਂ ਊਸ਼ਾ ਕੰਪਨੀ ਦੇ ਲੇਬਲ ਵਾਲੀਆਂ) ਅਤੇ ਇੱਕ ਈ-ਰਿਕਸ਼ਾ ਜ਼ਬਤ ਕੀਤਾ, ਜਿਸਦੀ ਵਰਤੋਂ ਮਾਲ ਦੀ ਢੋਆ-ਢੁਆਈ ਲਈ ਕੀਤੀ ਜਾ ਰਹੀ ਸੀ। ਦੋਵਾਂ ਮੁਲਜ਼ਮਾਂ ਖ਼ਿਲਾਫ਼ ਕਾਪੀਰਾਈਟ ਐਕਟ 1957 ਦੀ ਧਾਰਾ 63-65 ਤਹਿਤ ਮਾਮਲਾ ਦਰਜ ਕਰ ਲਿਆ ਗਿਆ ਹੈ।ਪੁਲਿਸ ਹੁਣ ਇਸ ਗੱਲ ਦੀ ਡੂੰਘਾਈ ਨਾਲ ਜਾਂਚ ਕਰ ਰਹੀ ਹੈ ਕਿ ਇਹ ਨਕਲੀ ਧੰਦਾ ਕਿੰਨੇ ਸਮੇਂ ਤੋਂ ਚੱਲ ਰਿਹਾ ਸੀ, ਮੁੱਖ ਖਰੀਦਦਾਰ ਕੌਣ ਸਨ ਅਤੇ ਨੈੱਟਵਰਕ ਕਿਹੜੇ ਸ਼ਹਿਰਾਂ ਤੱਕ ਫੈਲਿਆ ਸੀ।